ఎక్కడ సంపద ఉంటే...అక్కడ దోపిడి

ఇన్ని రోజులు సీమాంధ్ర నేతలను టార్గెట్ చేసిన టిఆర్ఎస్ నేతలు ఇప్పుడు సీమాంధ్ర అధికారులపై దృష్టి సారించారు. నాయకుల భూ ఆక్రమణలకు అధికారులు సహకరిస్తే వదిలిపెట్టేది లేదని హెచ్చరిస్తున్నారు. ఒక్కొక్క ఆక్రమణను, అధికారులు, నాయకుల పేర్లను బయటపెడుతామంటున్నారు. కొంతమంది తెలంగాణ కాంగ్రెస్ నేతలు కుక్కల వలె వ్యవహరించడం వల్లే ఈ పరిస్థితి వచ్చిందంటున్నారు.


ఎక్కడ సంపద ఉంటే...అక్కడ దోపిడి ఉంటుందనేది నానుడి. హైదరాబాద్ రాజధాని కావడంతో సహజంగానే ఆ ప్రాంతంలోని భూములకు, దాని చుట్టుపక్కల నున్న రంగారెడ్డి జిల్లా భూములకు డిమాండ్ ఏర్పడింది. దీంతో పాటు హైదరాబాద్ ఐటి హబ్ గా మారడం, రియల్ ఎస్టేట్ బూమ్ రావడంతో ఇక్కడి భూముల ధరలకు రెక్కలొచ్చాయి. గత దశాబ్దకాలంగా నగరంలో భూములకు ఎక్కడ లేని విలువ పెరిగింది. దీంతో నాయకుల అండదండలతో రియల్ ఎస్టేట్ వ్యాపారులు కూడా భూ ఆక్రమణలు, దందాలు బాగానే చేశారు. అనేక కేసులు నమోదయ్యాయి. ఇది అందరికి కనిపిస్తున్న దందానే. అయితే ఇటీవల గత కొంతకాలంగా టిఆర్ఎస్ నేతలు భూ దందాలపై హెచ్చరికలు జారీ చేస్తున్నారు. విభజన జరుగుతున్న సమయంలో సీమాంధ్ర నేతలు, అక్కడి ప్రాంత అధికారుల సహకారంతో ప్రభుత్వానికి చెందిన భూములను ఇష్టారాజ్యంగా ప్రైవేట్ సంస్థలకు కట్టబెడుతున్నారని మండిపడుతున్నారు. ముఖ్యంగా సిఎం కిరణ్ కుమార్ రెడ్డి గత నాలుగైదు నెలలుగా తన సోదరుడి ఆధ్వర్యంలో ఇదే పనిలో ఉన్నారని విమర్శిస్తున్నారు. ఇట్లాంటి భూ పందేరాలను వదలబోమని, కచ్చితంగా వీటిపై రివ్యూ చేస్తామని టిఆర్ఎస్ అధినేత కేసిఆర్ స్వయంగా హెచ్చరించారు. ఇప్పుడు ఆ పార్టీ టిఆర్ఎస్ఎల్పీ ఉపనేత హరీష్ రావు మరోసారి దీనిపై మరోసారి మాట్లాడారు. సిఎం కిరణ్ కుమార్ రెడ్డి, రెవెన్యూ మంత్రి కలిసి సచివాలయం అడ్డాగా ఈ భూ ఆక్రమణలకు పాల్పడుతున్నారని, రెవెన్యూ మంత్రి ఓఎస్ డి ఆధ్వర్యంలో భూ సెటిల్ మెంట్లు జరుగుతున్నాయని ఆరోపించారు.