వజ్ర బస్సులు ప్రారంభం

టీఎస్‌ ఆర్టీసీని నష్టాల నుంచి గట్టెక్కించేందుకు తన వంతు ప్రయత్నాలు చేస్తున్నానని ముఖ్యమంత్రి కేసీఆర్‌ అన్నారు. కొత్తగా ప్రవేశపెట్టిన వజ్ర మినీ బస్సులను ప్రారంభించారు. . ప్రయాణికుల సౌకర్యార్థం వివిధ కాలనీ నుంచి వజ్ర బస్సులు నడుస్తాయని సీఎం చెప్పారు. హైదరాబాద్‌లోని పలు కాలనీ నుంచి వరంగల్‌, నిజామాబాద్‌కు వజ్ర సర్వీసులు నడుస్తాయని తెలిపారు. త్వరలోనే మరిన్ని నగరాలకు ఈ సర్వీసులను ఏర్పాటు చేయనున్నామని వెల్లడించారు. వజ్ర బస్సులు దేశంలోనే వినూత్నమైనవిగా నిలవాలని సీఎం కేసీఆర్‌ ఆకాంక్షించారు.

ఈ సందర్భంగా ప్రగతి భవన్‌లో నిర్వహించిన కార్యక్రమంలో కేసీఆర్‌ మాట్లాడుతూ గతంలో ఆర్టీసీని ప్రైవేటు పరం చేస్తారేమోనన్న భయం ప్రజల్లోనూ, ఆర్టీసీ ఉద్యోగుల్లోనూ ఉండేదన్నారు. పట్టణ ప్రాంతాల్లో ఆర్టీసీకి నష్టాలు సర్వసాధారణం అయిపోయాయని అన్నారు. ఆర్టీసీని నష్టాల నుంచి గట్టెక్కించే చర్యల్లో భాగంగా హైదరాబాద్‌ పరిధిలోని ఆర్టీసీ నష్టాలను జీహెచ్‌ఎంసీ నిధులతో పూడ్చాలని చర్చించామని, ఇక నుంచి ప్రతినెలా జీహెచ్‌ఎంసీ నుంచి ఆర్టీసీకి కొన్ని నిధులు వచ్చేలా చేస్తామన్నారు