అసెంబ్లీలో సమైక్య, తెలంగాణ నినాదాలు

సభ్యుల పోటీపోటీ నిరసనల మధ్య శాసనసభ సమావేశాలు సోమవారం నాటికి వాయిదా పడ్డాయి. అంతకు ముందు సభలో గందరగోళం నెలకొనడంతో... సహకరించాలని ఉపసభాపతితో పాటు, మంత్రి శ్రీధర్‌బాబు సభ్యులకు పదేపదే విజ్ఞప్తి చేశారు. బిల్లుపై అభిప్రాయాలు తెలుసుకునేందుకు అందరూ సహకరించాలని కోరారు. సభ సజావుగా నడవడానికి ఆయా పార్టీల ఫ్లోర్ లీడర్లు తమ సభ్యులను కూర్చోబెట్టాలని, లేకపోతే సభ నడపటం కష్టమవుతుందని వివరించారు. అయినా పరిస్థితిలో మార్పు కనిపించలేదు. దీంతో డిప్యూటీ స్పీకర్ మల్లు భట్టి విక్రమార్క సభను సోమవారం నాటికి వాయిదా వేశారు. ఇదే పరిస్థితి కారణంగా శాసనమండలి సైతం సోమవారం నాటికి వాయిదా పండింది.
అంతకు ముందు అసెంబ్లీ అరగంట పాటు రెండు సార్లు వాయిదా పడింది. విపక్షాలు ఇచ్చిన వాయిదా తీర్మానాలను స్పీకర్ నాదెండ్ల మనోహర్ తిరస్కరించారు. సభ్యులు తెలంగాణ, సమైక్య నినాదాలతో గందరగోళం సృష్టించారు. సభా కార్యకలాపాలకు ఆటంకం ఏర్పడటంతో స్పీకర్ సభను అరగంటపాటు వాయిదా వేశారు. సభ్యుల ఆందోళనలతో శాసనమండలి సైతం ప్రారంభమైన వెంటనే వాయిదా పడింది. సభ తిరిగి ప్రారంభమైనా పరిస్థితిలో ఎటువంటి మార్పు రాలేదు. తెలంగాణ, సమైక్య నినాదాలతో స్పీకర్ పోడియాన్ని చుట్టుముట్టారు. దీంతో స్పీకర్ సభను మరోసారి అరగంట వాయిదా వేశారు. శాసనమండలిలోనూ ఇదేరీతిలో వాయిదా వేశారు.